ఫైజర్ టీకా అత్యవసర వినియోగానికి అనుమతులు ఇచ్చిన తొలి దేశంగా బ్రిటన్ నిలిచింది. రానున్న వారాల్లో ప్రజలకు టీకాను అందించేందుకు సిద్ధమవుతోంది. ఇందుకోసం ఓ ప్రణాళికను రూపొందించింది. అయితే ఈ ప్రక్రియ అంత సులభమైన విషయమా? ఇందులో అడ్డంకులున్నాయా? అసలు బ్రిటన్ ప్రణాళిక ఏంటి?
బ్రిటన్ వద్ద ఎన్ని వ్యాక్సిన్ డోసులున్నాయి?
40 మిలియన్ డోసుల కోసం ఆర్డర్లు ఇచ్చింది బ్రిటన్. కానీ అవి సరిపోవు. ఒక్కరికి రెండేసి డోసులు ఇవ్వాల్సిన నేపథ్యంలో.. 20మిలియన్ మందికే వ్యాక్సిన్ అందుబాటులో ఉంటుంది. 16ఏళ్లు పైబడిన వారికే టీకా వేయించాలని బ్రిటన్ నిర్ణయించుకున్నప్పటికీ.. మరో 53మిలియన్ డోసులుకుపైగా అవసరం ఉంది.
వ్యాక్సిన్ ఎప్పుడు బయటకొస్తుంది?
బెల్జియం నుంచి వచ్చిన కొన్ని రోజులకు ఫైజర్ వ్యాక్సిన్ను అందుబాటులోకి తీసుకురావాలన్నది బ్రిటన్ ప్రణాళిక. వచ్చే వారంలో 8లక్షల డోసులు బ్రిటన్కు చేరుకుంటాయని ఆ దేశ ఆరోగ్యశాఖ కార్యదర్శి మ్యాట్ హెన్కాక్ ప్రకటించారు. మిగిలిన వాటి కోసం వేచిచూడాలి.
బ్రిటన్ ప్రణాళిక పనిచేస్తుందా?
ప్రణాళిక అమలు చేయడం అంత సులభమైన విషయం కాదు. -70 డిగ్రీల వద్ద టీకాను నిల్వ ఉంచి, పంపిణీ చేయాలి. ఇదే అతిపెద్ద సమస్య. అయితే రిఫ్రిజిరేటర్లోని సాధారణ ఉష్ణోగ్రతల్లో కొన్ని రోజుల పాటు నిల్వ ఉంచగలిగే అవకాశం ఉండటం సానుకూల అంశం. వ్యాక్సిన్ పంపిణీ కోసం నేషనల్ హెల్త్ సర్వీస్ను ఉపయోగించుకోవాలని చూస్తోంది బ్రిటన్. స్థానిక వైద్యులు, వ్యాక్సినేషన్ సెంటర్లను కూడా వాడుకోవాలని చూస్తోంది.
ఇదీ చూడండి:- 'ఆ వ్యాక్సిన్ను నిల్వ చేయటం పెద్ద సవాలే'
ఎంత కాలం పడుతుంది?
ప్రణాళిక పూర్తి స్థాయిలో అమలు చేయాలంటే కొన్ని నెలల సమయం పడుతుంది. అవసరానికి సరిపడా ఫైజర్ టీకా డోసులు ప్రస్తుతం బ్రిటన్ వద్ద లేవు. మరో రెండు టీకా సంస్థలతో చర్చలు జరుపుతోంది. అవి మోడెర్నా, ఆక్స్ఫర్డ్ టీకాలు. మోడెర్నా మంచి ఫలితాలే ఇస్తున్నప్పటికీ ఆక్స్ఫర్డ్ వ్యాక్సిన్ తక్కువ ప్రభావితమని నివేదికలు చెబుతున్నాయి.
ఇదీ చూడండి:- శుభవార్త: 94.5% ప్రభావవంతంగా మోడెర్నా టీకా!
'వ్యాక్సిన్ తప్పనిసరి' చేస్తుందా?
'వ్యాక్సిన్ను వేసుకోవడం తప్పనిసరి' అనే నిబంధనను బ్రిటన్ తీసుకురాకపోవచ్చు. అయితే అందరూ టీకా వేసుకోవాలని ప్రభుత్వం, ప్రజా ఆరోగ్య సంస్థలు విజ్ఞప్తి చేస్తున్నాయి.
తొలుత వ్యాక్సిన్ అందేది ఎవరికి?
కరోనా ప్రభావం ఎక్కువగా ఉన్నవారికే టీకా అందుతుంది. కొవిడ్-19తో మృతిచెందే ప్రమాదం ఎక్కువ ఉన్న వారికే తొలి ప్రాధాన్యతనివ్వాలని.. 'వ్యాక్సినేషన్ అండ్ ఇమ్యునేషన్'పై ఏర్పాటు చేసిన స్వతంత్ర సంయుక్త కమిటీ.. బ్రిటన్ ప్రభుత్వానికి స్పష్టం చేసింది. నర్సింగ్హోంలలో ఉన్న వృద్ధులు(80ఏళ్లు), పెద్దవారు, ఆరోగ్య సిబ్బందికి తొలుత ఈ టీకా అందనుంది.
ఆ తర్వాత ఎవరికి?
75ఏళ్లుపైబడిన వారికి వ్యాక్సిన్లు అందించాలి. ఆ తర్వాత 70ఏళ్లుపైబడినవారికి ఇవ్వాలి. తొలి దశ వ్యాక్సినేషన్ కోసం మొత్తం 9బృందాలను ఏర్పాటు చేసింది బ్రిటన్. వీరిలో 50ఏళ్లుపైబడి వారు ఉన్నారు.
వ్యాక్సినేషన్ ప్రణాళికను ఖరారు చేశారా?
ప్రణాళికను ఇంకా ఖరారు చేయలేదు. ఇందులో ఎన్నో ప్రశ్నలకు ప్రభుత్వం వద్ద సమాధానం లేదు. ముఖ్యంగా.. నర్సింగ్హోంలకు ఫైజర్ టీకాను ఎలా పంపిణీ చేయాలన్నదానిపై స్పష్టత లేదు.
ఇదీ చూడండి:- మోడెర్నా, ఫైజర్ కంటే తక్కువ ధరలోనే..!
రెండు డోసుల తర్వాత పరిస్థితేంటి?
రెండు డోసులు వేసుకున్న నెల రోజులకు మనిషిలో రోగ నిరోధక శక్తి పెరుగుతుంది. టీకాపై ఉన్న డేటాలు ఈ విషయాన్ని సూచిస్తున్నాయి. తొలి డోసు తర్వాతే రోగనిరోధక శక్తి పాక్షికంగా పెరుగుతుంది. అయితే రెండు టీకాలు వేసుకున్న వారం రోజుల్లోనే ఇమ్యూనిటీ పెరుగుతుందని బ్రిటన్ అధికారులు భావిస్తున్నారు. కానీ ఈ ఇమ్యూనిటీ ఎంతకాలం ఉంటుందన్నది ఇంకా ప్రశ్నార్థకమే.
దీర్ఘకాల ప్రణాళిక సంగతేంటి?
ప్రణాళికలు అమలు చేయడం మొదలుపెట్టినప్పుడే.. ప్రశ్నలకు సమాధానం దొరుకుతుంది. వార్షికంగా టీకా వేయించుకోవాలా? లేక రెండు డోసులు సరిపోతాయా? అన్న ప్రశ్నలకు కూడా ఇప్పట్లో సమాధానం దొరకదు. సైడ్-ఎఫెక్ట్స్పైనా దృష్టి పెట్టాల్సి ఉంటుంది. ఈ వ్యవహారాన్ని పర్యవేక్షించేందుకు బ్రిటన్ ఏర్పాట్లు చేస్తోంది.
టీకా ప్రణాళికపై అనుమానాలు వస్తే?
టీకా ప్రణాళికను సరిగ్గా అమలు చేయడం ఎంతో కీలకమని.. దాని ద్వారా వ్యాక్సిన్పై ప్రజల్లో నమ్మకం పెరుగుతుందని అధికారులు భావిస్తున్నారు. తప్పుడు సమాచారాన్ని అరికట్టడానికి ప్రభుత్వం చర్యలు చేపడుతోంది. టీకా ప్రణాళికలు అమలు చేయడానికి సమాజంలోని గౌరవప్రదమైన వారిని నియమించుకునేందుకు చూస్తోంది ప్రభుత్వం.
ఇదీ చూడండి:- 'ఏప్రిల్ నాటికి సాధారణ ప్రజలకు టీకా'
